其實呢篇文，前晚寫好左，只係臨出之前，突然見到林作篇訪問，諗兩諗，頂，堅頂唔順，所以就幫左佢開年先。開完佢年之後，就冇心機幫薯片呢篇文做校對，男人嘛，貴精不貴多，一日出兩次會影響質量的，所以我都係隔一隔先出呢篇啦…
大家有睇我之前啲文，都知道我對於香港的「美食車」抱著極為質疑的態度。見到薯片單新聞，話美食車賣20蚊一個波蘿包好貴，我真係忍唔住＿出聲。
返去問題的根源，點解要賣到廿蚊一個？不如計一下數吧，整架美食車連裝修連設備，根據之前的報導所說，已經要一百萬，接下來租金大約2萬一個月，係呀，你買左架車擺檔交左牌費，而你唔係一間鋪都仲要交租，過癮呢？而最頂癮嘅係，呢個牌只係得兩年，冇錯，兩年之後萬一政府唔續你，甚至完全唔玩美食車，你就可以收檔total lost。如果你鐵定想收回成本，你必須要在兩年內賺回車價和租金，即係一百四十八萬。
如果你廿蚊一個波蘿包，我當你個波蘿包由天跌落黎零成本，你同你啲伙記一毫子人工都唔要，一年做足365日，每日24小時無休開檔，無論是順境或是逆境，富有或貧窮，健康或疾病你都如同結婚誓詞一樣堅持開工，一年要賣七十四萬個，即係每日要賣2055個，每兩分鐘要賣到三個，如果你係咁好彩去廸廸尼擺檔，我真係恭喜你呀，凌晨三點邊度搵人同你買波蘿包？我唔理，總之你都係要兩分鐘賣三個，你搵米奇老味買啦。
計完數，大家就明白，點解一個波蘿包要賣到廿蚊，我甚至擔心，佢廿蚊應該都回唔到本，賣一個蝕一個，你話今次係特登俾小市民拎到牌，定其實係大財團計過數發現根本維唔到本所以冇遞紙申請？香港一向奉行官商合作，今次咁好死唔俾大財團而係益你啲小市民，到底真係有好野益你，定係另一個瑞士山區肺，「我賺夠都想俾其他人賺下」？呢攤野係薯片搞出黎嘅，冤有頭債有主，點講佢都走唔甩，仲好意思走去話人廿蚊個波蘿包貴？根本一開始政府話成本大約係60萬就係計錯數，邊架美食車出到黎，唔係個個成百萬本扔落去？
點算好？一係眾籌填數囉，我地閒閒地都籌左成百萬俾佢選特首，唔差在救埋啲落左搭的水魚吧；一係就開放個牌照買賣，大家擺底啲車，淨係炒個牌，好似的士咁，譚惠珠很可能支持你的。
最後，你問我支持林鄭定薯片？傻啦，第一我沒票，第二我在英國了，有咩所謂？講兩句我可以，但叫我真金白銀掏100元眾籌，我同呢個page一千個follower加埋都唔夠佢有錢呀，籌籌籌，食懵左呀？你咁鍾意俾錢，企係和黃門口派利是俾李嘉誠啦笨～真係陰功，你叫全天下的乞丐情何以堪？
Search